Salah satu permainan boardgame yang paling den minat adolah catur. Oghang kampung den panggil chess. Hehehe. Den mulo main game ni daghi kochik laie, punco eh abah den la.. dio ni mmg biaso masuk pertandingan catur, jadi diolah yang memboghi galakan dan sokongan pado den.

Malam tadi sambil melayan dvd den teringat kes den lawan catur dongan soghang mamat ni maso kek UPM. Dio ni memang hebat, kalau tak silap wakil negeri ko wakil negaro.. macam tu la. Den lawan dengan dio 4 kali. 3 kali den kalah. kali keompek den monang. :)

Lopeh monang tu den buek analisa, macam mano den bulih monang. Maso main dengan dio ni, dio macam dah tahu semuo move den. Ghupho eh, bilo kito dah selalu bonar main chess ni, dalam kepalo kito dah macam ado satu pattern, kito seolah-olah dah hafal semuo atau hampir semuo kemungkinan move-move pihak lawan.


Bilo den sodar perkaro ni, lawan den ni seolah-olah komputer yang dalam memori eh dah ado semuo kemungkinan move yang biaso dilakukan. Den teringat ado satu cito den nengok, dalam tu dio cito macam mano Kasparov leh kalahkan Deep Blue.

"He made the most unexpected move"

Jadi den pun buek la move macam tu, dan lawan den hilang punco. Kemudian den caghik the weakest square dan den attack kek situ. Hehehe..

Hmm.. Chess ni adolah satu game yang sangat baik untuk perkembangan otak. Terlampau banyak kemungkinan yang ado dalam game ni. Dan chess ni banyak menceghitokan liku-liku kehidupan. Hehehe

"Aku ini ibarat buah Catur.. DIAlah pemainnya"

Kato-kato ahli sufi ni kadang kalo seolah-olah mencarik adat. Dioghang ni berkato dalam keadaan asyik dan mahsyuk. Macam kato-kato kek eteh tu kalau salah paham bulih jadi macam Jabariyah. Jadi kesimpulan eh.. bondo macam ni kono berguru.